(ARP) Mapa dos toponimos arpetans
Y'est un projèt pèrsonèl de compilacion dos toponimos arpetans, accessiblo a tot lo mondo.
Lo lim vèrs la mapa : clicâd icé
La mapa a come objèctif de covrir tota l'Arpetania, mas dos noms arpetans de veles defôrs de l'Arpetania povont étre ètot endicâs, surtot des grandes veles.
Pœr lo moment, ma sôrsa prencipâla est lo Vouiquipèdia arpetan, y'est pœr cen que des règions arpetanes ont gins d'enformacions (surtot los dèpartaments de Sona-et-Lêre, Jura et Dubs), ales ont pas oncora ètâ listâyes diens Vouiquipèdia. Je so aprés continuar la lista.
Ressôrces
- https://frp.wikipedia.org/wiki/Cat%C3%A8gorie:Lista_de_comenes_arpetanes
- http://www.gioventurapiemonteisa.net/wp-content/uploads/2009/08/Communes-savoisiennes.pdf
É y at dues cuches de pouents : una que reprèsente les comunes (en blu), et una que reprèsente les ôtres localitâts plus petites (en roge).
Pœr avêr lo nom, vos povéd clicar sur lo pouent, una bula s'afiche avouéc totes les enformacions.
Châqu'yon pouent at son nom prencipâl balyâ en grafia ORB.
Diens la lègenda de dessot, la sôrsa est endicâye. Quand j'é povu trovar la prononciacion en alfabèt fonètico entèrnacionâl, j'y é apondu. Tot pariér avouéc lo nom diens d'ôtres grafies, surtot en Savouè ou diens lo Vâl d'Oûta onte que les grafies de Conflans & BREL sont empleyêes.
De fês, j'é jugiê utilo de changiér un quârque-rien, surtot pœr les finâles en -iô prononciêes /jy/, que je prèfèro ècrire -iu, y'est chiér frèquent us alentœrns de Liyon.
De fês ètot, los noms sont proposâs pœr mè, quand j'é pas trovâ de sôrsa. Diens céti cas, l'origina ètimologica est endicâye.
Vos povéd èxportar les balyêes de la mapa. Lo boton "Partagiér et tèlèchargiér" a gôche vos permèt d'èxportar tués los pouents us fôrmats geojson, gpx, kml ou bien csv. É y at ètot un boton pœr tèlèchargiér tota la mapa. Cen pôt étre totjorn utilo si vos voléd avêr la lista tot lo temps avouéc vos, si vos voléd travalyér avouéc, ou bien si vos voléd y consèrvar mémo si lo sito devient enaccèssiblo. Notâd que lo projèt est totjœrn en èvolucion et que cen pôt étre utilo de re-tèlèchargiér les balyêes betâyes a jœrn de temps en temps.
Si un nom vos semble fôs :
Mâlgrât tot lo souen diens la rèalisacion de la mapa, j'é povu fêre des errœrs.
Si la sôrsa est Vouiquipèdia (y'est lo cas pœr la majoritat des comunes), vos povéd corregiér la pâge corrèspondanta dirèctament. Je vos conselye d'y justifiér voutron changement.
Diens tués los câs, vos povéd me balyér un mèl a larpetani@riseup.net pœr me pèrvegnir, ou bien me proposar un ôtro nom (si possiblo justifiê avouéc l'ètimologia ou bien una atèstacion de l'utilisacion locâla, y'est miu), ou oncora me balyér una ôtra sôrsa.
Si vos voléd m'èdar a complètar la mapa :
Tot-pariér que davant, vos povéd me balyér una sôrsa ou me fére voutres proposicions a larpetani@riseup.net
Mercé de voutra lèctura, et j'espèro que céta mapa vos serat utila -